Утверждение на тя надеющихся

Сретение Господа Бога и Спаса нашего Иисуса Христа.

15 февраля.

Тропа́рь, гла́с 1:

Ра́дуйся, Благода́тная Богоро́дице Де́во, из Тебе́ бо возсия́ Со́лнце пра́вды — Христо́с, Бо́г на́ш, просвеща́яй су́щия во тме́. Весели́ся и ты́, ста́рче пра́ведный, прие́мый во объя́тия Свободи́теля ду́ш на́ших, да́рующаго на́м воскресе́ние.

Велича́ние:

Велича́ем Тя́, Живода́вче Христе́, и чте́м Пречи́стую Ма́терь Твою́, Еюже по зако́ну ны́не прине́слся еси́ в хра́м Госпо́день.

Стихи́ра, гла́с 6:

Да отве́рзется две́рь небе́сная дне́сь: безнача́льное бо Сло́во Отчее, нача́ло прии́м под ле́ты, не отсту́пль Своего́ Божества́, от Де́вы я́ко Младе́нец четыредесятодне́вен Ма́терию во́льне прино́сится в це́рковь зако́нную, и Сего́ на ру́ки прие́млет ста́рец, — отпусти́, — зовы́й, — раба́, Влады́ко, и́бо о́чи мои́ ви́деста спасе́ние Твое́. Прише́дый в ми́р спасти́ ро́д челове́чь, Го́споди, сла́ва Тебе́.

Кано́н, гла́с 3.

Пе́снь 1.

Ирмос: Су́шу глубороди́тельную зе́млю со́лнце наше́ствова иногда́: я́ко стена́ бо, огусте́ обапо́лы вода́ лю́дем пешомореходя́щим и богоуго́дно пою́щим: пои́м Го́сподеви, сла́вно бо просла́вися.

Припев: Слава Тебе, Боже наш, слава Тебе

Да ка́плют во́ду о́блацы, Со́лнце бо, на о́блаце ле́гце носи́мо, наста́ло е́сть, на нетле́нную руку́, Христо́с в це́ркви я́ко Младе́нец. Те́мже, ве́рнии, возопии́м: пои́м Го́сподеви, сла́вно бо просла́вися.

Крепи́теся, ру́це Симео́ни, ста́ростию осла́бленнии, лы́ста же претружде́нна ста́рча правобыстро́ движи́тася Христу́ на сре́тение, ли́к со безпло́тными соста́вльше, пои́м Го́сподеви, сла́вно бо просла́вися.

Ра́зумом просте́ртая небеса́, весе́литеся, и ра́дуйся, земле́, из Пребоже́ственных бо не́др Хитре́ц проше́д Христо́с, Ма́терию Де́вою Бо́гу Отцу́ прино́сится Младе́нец, Иже пре́жде все́х, сла́вно бо просла́вися.

Пе́снь 3.

Ирмос: Утвержде́ние на Тя́ наде́ющихся, утверди́, Го́споди, Це́рковь, Юже стяжа́л еси́ честно́ю Твое́ю кро́вию.

Перворожде́н из Отца́ пре́жде ве́к, перворожде́н Младе́нец из Де́вы нетле́нныя, Ада́му ру́ку простира́я, яви́ся.

Младоу́мна бы́вша пре́лестию первозда́ннаго па́ки исправля́яй Бо́г Сло́во, младе́нствовав, яви́ся.

Земли́ исча́дие, па́ки поте́кшее в ню́, Божества́ сообра́зное естество́ Зижди́тель я́ко непрело́жне, младе́нствовав, яви́.

Седа́лен, гла́с 4.

На горе́ Сина́йстей дре́вле ви́де Моисе́й за́дняя Бо́жия, и то́нкий Боже́ственный гла́с сподо́бися во мра́це же и ви́хре слы́шати. Ны́не же Симео́н воплоще́ннаго Бо́га непрело́жне на́с ра́ди на ру́ки прия́т и ра́достно тща́шеся ити́ от су́щих зде́ к животу́ ве́чному. Те́мже вопия́ше: ны́не отпуща́еши раба́ Твоего́, Влады́ко.

Пе́снь 4.

Ирмос: Покры́ла е́сть небеса́ доброде́тель Твоя́, Христе́, из Киво́та бо проше́д святы́ни, Твоея́ Нетле́нныя Ма́тере, в хра́ме Сла́вы Твоея́ яви́лся еси́, я́ко Младе́нец руконоси́мь, и испо́лнишася вся́ Твоего́ хвале́ния.

Ра́дуйся, Симео́не, неизрече́нных таи́нниче, — Богоро́дица вопия́ше, — о Не́мже от Свята́го дре́вле извести́ся тебе́ Ду́ха, младе́нствовавшаго Сло́ва Христа́ на ру́ки приими́, зовы́й Ему́: испо́лнишася вся́ Твоего́ хвале́ния.

На Него́же упова́л еси́, Симео́не, во́зраст де́тищный, ра́дуяся, подыми́ Христа́, Изра́иля боже́ственнаго утеше́ние, зако́на Творца́ и Влады́ку, исполня́ющаго зако́на чи́н, зовы́й Ему́: испо́лнишася вся́ Твоего́ хвале́ния.

Ви́дя Симео́н Сло́во безнача́льное, с пло́тию, я́ко на престо́ле херуви́мстем, Де́вою носи́мо, вино́внаго е́же бы́ти вся́ческих, я́ко Младе́нцу дивя́ся, вопия́ше Ему́: испо́лнишася вся́ Твоего́ хвале́ния.

Пе́снь 5.

Ирмос: Яко ви́де Иса́ия обра́зно на престо́ле превознесе́на Бо́га, от Ангел сла́вы дориноси́ма, — о, окая́нный, — вопия́ше, — а́з! Прови́дех бо воплоща́ема Бо́га, Све́та невече́рня, и ми́ром влады́чествующа.

Разуме́в боже́ственный ста́рец проявле́нную дре́вле проро́ку сла́ву, рука́ми Сло́во зря́ Ма́терними держи́мо, — о, ра́дуйся, — вопия́ше, — Чи́стая! Яко престо́л, бо держи́ши Бо́га, Све́та невече́рняго и ми́ром влады́чествующа.

Покло́нься ста́рец, и стопа́м боже́ственне прикосну́вся неискусобра́чныя и Богома́тере, — Огнь, — рече́, — но́сиши, Чи́стая: Младе́нца бою́ся объя́ти Бо́га, Све́та невече́рняго и ми́ром влады́чествующа.

Очища́ется Иса́ия, от серафи́ма у́гль прие́м, — ста́рец вопия́ше Богома́тери, — Ты́, я́коже клеща́ми, рука́ми просвеща́еши мя́, пода́вши, Его́же но́сиши, Све́та невече́рняго и ми́ром влады́чествующа.

Пе́снь 6.

Ирмос: Возопи́ к Тебе́, ви́дев ста́рец очи́ма спасе́ние, е́же лю́дем прии́де от Бо́га: Христе́, Ты́ Бо́г мо́й.

Сио́ну Ты́ ка́мень возложи́лся еси́, непокори́вым претыка́ние и собла́зна ка́мень, неруши́мое ве́рных спасе́ние.

Изве́стне нося́ начерта́ние Иже пре́жде ве́к Тя́ израсти́вшаго, земны́х за милосе́рдие ны́не не́мощию обложи́ся.

Сы́ну Вы́шняго, Сы́ну Де́вы, Бо́гу, Отроча́ти бы́вшему, покло́ньшася Тебе́ ны́не отпусти́ с ми́ром.

Конда́к, гла́с 1:

Утро́бу Деви́чу освяти́вый Рождество́м Твои́м и ру́це Симео́не благослови́вый, я́коже подоба́ше, предвари́в, и ны́не спа́сл еси́ на́с, Христе́ Бо́же, но умири́ во бране́х жи́тельство и укрепи́ Импера́тора, Его́же возлюби́л еси́, Еди́не Человеколю́бче.

Икос:

К Богоро́дице притеце́м, хотя́щии Сы́на Ея́ ви́дети, к Симео́ну носи́ма, Его́же с небесе́ безпло́тнии ви́дяще, дивля́хуся, глаго́люще: чу́дная зри́м ны́не и пресла́вная, непостижи́мая, несказа́нная! Иже бо Ада́ма созда́вый но́сится я́ко Младе́нец, Невмести́мый вмеща́ется на рука́х ста́рчих, Иже в не́дрех неопи́санных Сы́й Отца́ Своего́ во́лею опису́ется пло́тию, а не Божество́м, Еди́н Человеколю́бец.

Пе́снь 7.

Ирмос: Тебе́ во огни́ ороси́вшаго о́троки богосло́вившия, и в Де́ву нетле́нну все́льшагося Бо́га Сло́ва пои́м, благоче́стно пою́ще: благослове́н Бо́г оте́ц на́ших.

Ада́му извести́ти хотя́й иду́, во а́де живу́щу, и Еве принести́ благове́стие, — Симео́н вопия́ше, со проро́ки лику́я: благослове́н Бо́г оте́ц на́ших.

Ро́да зе́мна избавля́яй Бо́г да́же до а́да прии́дет, пле́нным же пода́ст все́м оставле́ние и прозре́ние слепы́м, я́ко и немы́м вопи́ти: благослове́н Бо́г оте́ц на́ших.

И Твое́ се́рдце, Нетле́нная, ору́жие про́йдет, — Симео́н Богоро́дице провозгласи́, — на Кресте́ зря́щи Твоего́ Сы́на, Ему́же вопие́м: благослове́н Бо́г оте́ц на́ших.

Пе́снь 8.

Ирмос: Нестерпи́мому огню́ соедини́вшеся, богоче́стия предстоя́ще, ю́ноши, пла́менем же неврежде́ни, Боже́ственную пе́снь поя́ху: благослови́те, вся́ дела́ Госпо́дня Го́спода, и превозноси́те во вся́ ве́ки.

Лю́дие Изра́илевы, Твою́ сла́ву Емману́ила зря́ще Отроча́ из Де́вы, пред лице́м Боже́ственнаго ковче́га ны́не лику́йте: благослови́те, вся́ дела́ Госпо́дня, Го́спода и превозноси́те во вся́ ве́ки.

Се́, Симео́н вопия́ше, — пререка́емое зна́мение Се́й бу́дет, Бо́г Сы́й и Отроча́, — Сему́, ве́рнии, возопии́м: благослови́те, вся́ дела́ Госпо́дня, Го́спода и превозноси́те во вся́ ве́ки.

Живо́т Сы́й, Се́й бу́дет паде́ние непокори́вым, младе́нствовав Бо́г Сло́во, я́ко воста́ние все́м ве́рою пою́щим: благослови́те, вся́ дела́ Госпо́дня, Го́спода и превозноси́те во вся́ ве́ки.

Припе́в на 9-й пе́сни:

Богоро́дице Де́во, упова́ние христиа́ном, покры́й, соблюди́ и спаси́ на Тя́ уповаю́щих.

Пе́снь 9.

Ирмос: В зако́не се́ни и писа́ний о́браз ви́дим, ве́рнии: вся́к му́жеский по́л, ложесна́ разверза́я, свя́т Бо́гу. Те́м перворожде́нное Сло́во Отца́ Безнача́льна, Сы́на, первородя́щася Ма́терию неискусому́жно, велича́ем.

Иже дре́вним новорожде́нных го́рличищ супру́г дво́ица же бя́ше птенце́в, в ни́хже ме́сто боже́ственный ста́рец и целому́дренная Анна проро́чица от Де́вы рожде́нному и Сы́ну Единоро́дному Отчу, в це́рковь приноси́му, слу́жат, велича́юще.

Возда́л еси́ мне́, — вопия́ше Симео́н, — спасе́ния Твоего́, Христе́, ра́дование, восприими́ Твоего́ служи́теля, се́нию претружде́ннаго, но́выя благода́ти священнопропове́дника та́йнаго, во хвале́нии велича́юща.

Священноле́пно испове́дашеся Анна, прорица́ющи, целому́дренная, и преподо́бная, и ста́рица, Влады́це в це́ркви я́вственно, Богоро́дицу же, пропове́дающи все́м су́щим, велича́ше.

Свети́лен.

Ду́хом во святи́лищи предста́в, ста́рец на ру́ки восприя́т зако́на Влады́ку, вопия́: ны́не соу́з мя́ плотски́х разреши́, я́коже ре́кл еси́, с ми́ром: ви́дех бо очи́ма открове́ние язы́ков и Изра́илю спасе́ние.

Стихи́ры, гла́с 4.

Зако́н, и́же в писа́нии, / исполня́я, Человеколю́бец / в це́рковь ны́не прино́сится, / и Сего́ прие́млет ста́рыми рука́ми Симео́н ста́рец, — / ны́не отпуща́еши мя, — вопия́, — / ко о́ному блаже́нству: / ви́дех бо Тя́ дне́сь, пло́тию ме́ртвенною обложе́ннаго, / живото́м госпо́дствующа / и сме́ртию влады́чествующа.

Све́т во открове́ние язы́ков / яви́лся еси́, Го́споди, / на о́блаце седя́ ле́гце, / Со́лнце пра́вды, / зако́на сено́вное исполня́я / и нача́ло изъявля́я но́выя благода́ти. / Те́м, Тя́ ви́дев, Симео́н взыва́ше: / из истле́ния мя́ разреши́, / я́ко ви́дех Тя́ дне́сь.

Не́др Роди́теля не отлу́чся Божество́м, / вопло́щся, я́коже изво́лил еси́, / объя́тиями держи́мь Присноде́вы, / на ру́ки пода́лся еси́ богоприи́мца Симео́на, / руко́ю Твое́ю держа́й вся́ческая; / те́мже — ны́не отпуща́еши мя́, — / ра́достно взыва́ше, — / в ми́ре раба́ Твоего́, / я́ко ви́дех Тя́, Влады́ко.

Сла́ва, и ны́не, гла́с 6.:

На рука́х ста́рческих во дне́шний де́нь, я́ко на колесни́це херуви́мстей, восклони́тися благоизво́ливый, Христе́ Бо́же, и на́с, пою́щих Тя́, страсте́й мучи́тельства призыва́емый изба́ви и спаси́, я́ко Человеколю́бец.

Молитва ко Господу нашему Иисусу Христу

Господи Иисусе Христе, Единородный Сыне и Слове Божий, древле во пророцех виденный, якоже зерцалом в гаданий, в последок же дний сих плотию от Пресвятыя Девы Марии нетленно рожденный и в четыредесятный день сей во Святилище во сретение всему миру от Тоя, яко Младенец руконосим, явленный и во объятиях праведнаго Симеона во спасение всем сущим от Адама носимый! Коль преславно и пресветло Твое на руку Богоматери во храм Господень принесение и от святаго старца Божественное сретение Твое! Днесь небеса веселятся и радуется земля, яко видена быша шествия Твоя, Боже, шествия Бога нашего Царя, Иже во Святем. Древле Моисей восходит видети славу Твою, но не возможе увидити лица Твоего, зане явил еси ему точию задняя Своя. В пресветлый же день сей сретения Твоего Ты явил еси Себе человеком во святилище, сияя неизреченным Светом Божества, да вкупе с Симеоном видят Тя лицем к лицу и руками да осяжут Тя, и восприемши во объятия своя, да познают Ти Бога во плоти пришедша. Сего ради прославляем неизреченное снисхождение и велие человеколюбие Твое, яко пришествием Твоим даровал еси ныне небесную радость падшему древле роду человечу: Ты бо праведным судом Своим изгнал еси прародители наши из рая сладости в мир сей, ныне же помиловал еси нас и паки отверзл нам райския обители и обратил еси плач наш на радость, да падший Адам к тому уже да не стыдится Тебе за преслушание и да не будет скрыватися лица Твоего, Тобою призываемый, яко Ты пришел еси ныне, да возьмеши на Себе грех его, да омыеши его Своею кровию и да облечеши его нага суща в ризу спасения и одежду веселия и украсиши его, яко невесту красотою. Нам же всем Божественное Твое сретение воспоминающим, сподоби с мудрыми девами изыти на сретение Твое, Небесному Жениху нашему, с горящими светильниками веры, любви и чистоты, да улицезрим очами веры Божественное лице Твое, да восприимем Тя в душевныя объятия своя, и да понесем Тя в сердце своем во вся дни Живота своего, да будеши нам в Бога и мы в людие Твои. В последний же и Страшный день пришествия Твоего, егда вси святии изыдут на последнее и великое сретение Твое на воздусе, сподоби и нам усрети Тя, да тако всегда с Господом будем. Слава милосердию Твоему, Слава Царствию Твоему, Слава смотрению Твоему, Едине Человеколюбче, яко Твое есть Царство, и Сила, и Слава со Безначальным Твоим Отцем и Пресвятым и Благим и Животворящим Твоим Духом ныне и присно, и во веки веков. Аминь

Сретение Господне — это двунадесятый непереходящий праздник, который отмечается ежегодно 15 февраля (2 февраля по старому стилю) и установлен в память принесения во храм Христа Спасителя в 40-й день по рождении для совершения установленной жертвы. «Ныне отпущаеши раба Твоего, Владыко…». Церковно-славянское слово «сретение» можно перевести на русский язык словом «встреча». Встреча Ветхого Завета с Новым, встреча Симеона Богоприимца и Анны пророчицы с Господом Исусом Христом. Слово «сретение» наиболее полно передает смысл этого события, ведь оно означает не просто встречу, а встречу меньшего с большим, человека с Богом.

——————————————————————

Общее начало и конец всем канонам →
Порядок чтения по уставу
——————————————————————

Тропарь, глас 1-й

Радуися Обрадованная Богородице Дево, из Тебе бо возсия Солнце праведное Христос Бог наш, просвещая темныя. Веселися и ты старче праведныи, приемыи на руку Свободителя душам нашим, дарующаго нам воскресение.

Канон, глас 3-й

Песнь 1. Ирмос

Сушу глубородительную землю, солнце нашествова иногда, яко стена бо огусте оба полы вода, людем пешим глубину проходящим и богоугодно поющим, поем Господеви, славно бо прославися.

Запев: Слава Господи Сретению Твоему (поклон).

Да каплют воду облацы, солнце бо на облаце легце носимо настало есть, на нетленную руку, Христос в церкви яко Младенец. Темже вернии возопием, поем Господеви, славно бо прославися.

Запев. (Повторяем стих).

Слава. Крепитася руце Симеони, старостию ослаблени, лыста же претруждена старча право быстро движитася, Христу на сретение, лик с безплотными составите, поем Господеви, славно бо прославися.

И ныне. Разумом простертая небеса веселитеся, радуйжеся земле: из пребожественых бо недр хитрец прошед Христос, Материю Девою Богови Отцу приносится Младенец, иже прежде век, славно бо прославися.

Катавасия: Сохрани от бед рабы Своя Милостиве, яко усердно к Тебе прибегаем к милостивому Избавителю и всех Владыце Господу Исусу (поклон). Господи помилуй (3 раза с поклонами).

Песнь 3. Ирмос

Утвержение на Тя надеющимся, утверди Господи церковь Свою, юже стяжа честною си кровию.

Запев. Перворожден из Отца прежде век, перворожден Младенец из Девы нетленны, Адаму руку простирая явися.

Запев. (Повторяем стих).

Слава. Младоумна бывша прелестию первозданнаго, паки исправляя Бог Слово, младенствовав явися.

И ныне. Земли исчадие, паки текши к ней, Божества сообразное естество Содетель яко непреложно, младенствовав яви. Катавасия.

Слава, и ныне. Седален, глас 4-й. Младенствует мене ради, ветхии деньми. Чищением приобщевается Пречистыи Бог, да плоть уверит ми, юже от Девы. И сим Симеон поучаяся, позна Того Бога и человека, и яко жизнь целоваше, и радуяся старчески взываше: отпусти мя, Тя бо видех жизнь всяческих.

Песнь 4. Ирмос

Покрыла есть небеса добродетель Ти Христе, из киота бо прошед святыни Твоея, нетленныя Матере, в церкви славы Ти явися, яко Младенец на руку носимь, и исполнишася вся Твоего хваления.

Запев. Радуйся Симеоне неизреченным таинниче, Богородица вопияше, его же от Святаго древле возвеститися Духа, младенствовавша Слова Христа на руку приими, зовыи Ему, исполнишася вся Твоего хваления.

Запев. (Повторяем стих).

Слава. На Него же уповал еси Симеоне, возраст детищныи, радуяся подъими Христа, Израилю божественое утешение, закону Творца и Владыку, исполняющаго закона чин, зовыи Ему, исполнишася вся Твоего хваления.

И ныне. Виде Симеон Слово безначальное, с плотию яко на престоле Херувимсте Девицею носимо, виновнаго бытию всяческих, яко Младенцу дивяся вопияше Ему, исполнишася вся Твоего хваления. Катавасия.

Песнь 5. Ирмос

Яко виде Исаия образно на престоле превысоце Бога, от Ангел славы дароносима, о, окаянныи вопияше аз, провидех бо воплощаема Бога, Света невечерня, и миром обладающа.

Запев. Разумев божественыи старец, проявленную Древле пророку славу, плотию Слова зря Материю держима, о, радуися вопияше Чистая, яко престол бо держиши Бога, Света невечерня, и миром обладающа.

Запев. (Повторяем стих).

Слава. Поклонься старец, и стопам божествено прикоснуся, неискусобрачныя и Божия Матере, огнь, рече, носиши Чистая: Младенца боюся объяти Бога, Света невечерня, и миром обладающа.

И ныне. Очищается Исаия от Серафима угль прием, старец вопияше Божии Матери, Ты яко клещами, рукама просвещаеши мя, подавши ми, Его же носиши Света невечерня, и миром обладающа. Катавасия.

Песнь 6. Ирмос

Возопи к Тебе видев старец очима спасение, еже людем прииде от Бога Христе, Ты Бог мой.

Запев. Сиону Ты камень возложися, непокоривым претыкание, и соблазну камень, нерушимое верным спасение.

Запев. (Повторяем стих).

Слава. Известно нося начертание, иже прежде век Тя израстившаго, земных за милосердие, ныне немощию обложися.

И ныне. Сыну Вышняго, Сыну Девыя, Богу Отрочати бывшему, поклоньшумися, ныне отпусти с миром. Катавасия.

Слава, и ныне. Кондак, глас 1-й. Иже утробу Девичу освятив рожеством си, и руце Симеони благословив, яко же подобаше предварив, и ныне спасл еси нас Христе Боже: но умири во бранех житие наше, и укрепи людей, их же возлюбил еси, Едине Человеколюбче.

Икос. К Богородице притецем вернии, хотящии Сына Ея видети, к Симеону идуща. Его же с небесе безплотнии видяще, дивляхуся глаголюще, чудная зрим ныне и преславная, непостижимая и несказанная. Иже бо Адама создавыи, носимь есть яко Младенец, Невместимыи вмещается на руку Симеоню, иже в недрех не описанныи сыи Отца Своего, волею описуется плотию, а не божеством, Един Человеколюбец.

Песнь 7. Ирмос

Тебе в пещи оросившаго дети благословившия, и в Деву нетленно всельшагося, Бога Слова поем благочестно хваляще, благословен еси Господи Боже отец наших.

Адаму показуя иду, во аде живущу, и Евве принося благовестие, Симеон вопияше, с пророки ликуя, благословен Бог отец наших.

Запев. (Повторяем стих).

Слава. Рода землена избавляя Бог, даже до ада приидет. Пленным же подаст всем оставление, и прозрение слепым, яко и немым вопити, благословен Бог отец наших.

И ныне. И Твое сердце, Нетленная, оружие пройдет, Симеон Богородице провозгласи, на Кресте взирающи Своего Сына, Ему же вопием, благословен Бог отец наших. Катавасия.

Песнь 8. Ирмос

Непостоянным огнем совокупльшеся, иже благочестия предстояще юноши, пламенем же невреждени, божественую песнь пояху, благословите вся дела Господа, и превозносите Его во веки.

Запев. Людие Израилеви, вашу славу Еммануила зряще, Отроча из Девы, пред лицем божественаго ковчега ныне ликуйте, благословите вся дела Господа, и превозносите Его во веки.

Запев. (Повторяем стих).

Слава. Се Симеон вопияше, пререкаемое знамение Сей будет, Бог сыи и Отроча: Сему вернии возопием, благословите вся дела Господа, и превозносите Его во веки.

И ныне. Живот сыи Сей будет, падение неверным, младенствовав Бог Слово, яко востание всем верно зовущим, благословите вся дела Господа, и превозносите Его во веки. Катавасия.

Песнь 9. Ирмос

В законнем сеннописании, образ видим вернии, всяко бо Отроча ложесна разверзая, свято Богови, тем перворожденно Слово, от Отца безначальна Сына, перворождена из Матере неискусныя браку, величаем.

Запев с поклоном. Иже древним новорожденною горличищу супругу, версту же птенцу, ими же божественыи старец, и целомудреная Анна пророчица, иже от Девы рожденному, и Сыну единорасленому Отцу, в церковь приносиму служат величающе.

Запев. (Повторяем стих).

Слава. Воздал ми еси, вопияше Симеон, спасения си Христе радование, восприими Своего служителя, сенем претружденаго, новей благодати священнопроповедника и таинника, во хвалении величаем.

И ныне. Священнолепно исповедашеся Анна прорицающи, целомудреная и преподобная и старица Владыце, в церкви явствено. Богородицу же проповедающи, всем сущим величаше. Катавасия.

Задостойник: В законнем сеннописании, образ видим вернии, всяко бо Отроча ложесна разверзая, свято Богови, тем перворожденно Слово, от Отца безначальна Сына, перворождена из Матере неискусныя браку, величаем. (Поклон земной).

Отпуст: Возлегии на руку праведнаго Симеона, Господи Исусе Христе Сыне Божии, молитв ради пречистыя Твоея Матере, и всех святых, помилуй и спаси нас, яко Благ и Человеколюбец. Аминь.